ఉత్తర భారత తీపిపదార్ధాలు రాబ్రి, రాజ్‌భోగ్

ఉత్తర భారతంలో ప్రాచుర్యమైన తీపి పదార్ధాలు ఇవి. మన రాష్ట్రంలో కూడా పెద్ద పట్టణాల్లోని స్వీట్ దుకాణాల్లో లభిస్తుంది. వీటిని ఇంట్లోనే ఎలా చేసుకోవచ్చో చూద్దాం.
రాబ్రి
కావాల్సినవి
పాలు 2 లీటర్లు
పచ్చి కోవా - 200 గ్రాములు
(ఇది దొరకని వారు మిల్క్‌మెయిడ్ డబ్బా ఒకటి వాడుకోవచ్చు)
పంచదార - 100 గ్రాములు
యాలకుల పొడి - 1/2చెంచా
బాదం పలుకులు - 10
తయారీ విధానం
ముదుగా రెండు లీటర్ల పాలు ఒక లీటరయ్యేలా సన్నటి సెగపై, కలుపుతూ మరిగించాలి. ఆపై స్టవ్‌పై నుంచి దించి పంచదార, కోవా లేదా మిల్క్‌మెయిడ్ పాలు కలపాలి. అన్ని కలిసేలా బాగా కలియపెట్టాలి. మళ్లీ సన్నటి సెగపై వుంచి కలుపుతూ వుండాలి. యాలకుల పొడి, సన్నగా తరిగిన బాదం పలుకులు వేయాలి. స్టవ్ ఆర్పి, ఆ మిశ్రమాన్ని చల్లారిన తరువాత ఫ్రిజ్‌లో వుంచాలి. బాగా చల్లగా తయారై, మీగడలా తట్టుకట్టిన తరువాత తీసి వడ్డించాలి.
రాబ్రీ నవరంగ్
దీనికి రాబ్రీకి పెద్దగా తేడా వుండదు. రాబ్రీ తయారయ్యాక, కమలాపండు తొనల ముక్కలు, కిస్‌మిస్, అంజూర్ ముక్కలు కోసి, రాబ్రీపై అలంకరిస్తారు.

రాజ్‌భోగ్
రసగుల్లాలాగే వుండే ఈ రాజ్‌భోగ్ తయారీకి కావాల్సినవి
పాలు 1 లీటరు
పంచదార - 1 కప్పు
నీళ్లు - రెండున్నర కప్పులు
వెనిగర్ - 1 స్పూన్
బొంబాయిరవ్వ - 1 స్పూన్
పచ్చికోవా - 1 స్పూన్
రోజ్‌వాటర్ - 1 స్పూన్
జీడిపప్పు - ఆరు పలుకులు
బాదం పప్పు- ఆరు పలుకులు
తయారీ విధానం
పాలను మరిగించిన తరువాత, స్పూన్ వెనిగర్‌ను స్పూన్ నీళ్లలో కలిపి, పాలలో వేయాలి. దీంతో పాలు విరిగిపోతాయి. ఇప్పుడా పాలను తీసి సన్నటి మంచి క్లాత్‌లో వేసి నీటిని వేరు చేయాలి. మిగిలిన చిక్కటి మిశ్రమం (చనా)కు రవ్వ కలిపి బాగా మెదాయించాలి. ఇప్పుడా మిశ్రమాన్ని చిన్న చిన్న ఉండలుగా చేసి పక్కన పెట్టాలి. జీడిపప్పు, బాదంపప్పును సన్నగా గ్రైండ్ చేసి, కోవా కలపాలి. ఇప్పుడు ముందుగా తయారు చేసి పక్కన పెట్టుకున్న పాల విరుగు వుండలకు మధ్యలో చిన్న కన్నం చేసి, కొద్దిపాటి జీడిపప్పు, బాదం పప్పు మిశ్రమాన్ని వుంచి, మళ్లీ ఉండను యధాప్రకారం సరిచేయాలి. ఉండలకు పగుళ్లు లేకుండా చేసుకోవాలి.
ప్రెషర్ కుక్కర్‌లో రెండు కప్పుల నీళ్లు, 3/4 కప్పు పంచదార వేసి, సన్నటి సెగపై మరిగించాలి. బాగా మరిగిన తరువాత ఈ ఉండలను నెమ్మదిగా జారవిడిచి, కుక్కర్ మూత పెట్టి, వెయిట్ వుంచాలి. పది నిమషాలు వుంచి, వెంటనే స్టవ్ ఆర్పి, చల్లటి నీళ్లు జల్లి కుక్కర్‌ను వేగం చల్లారనివ్వాలి. అవసరమైతే నీళ్ల టాప్ కింద వుంచొచ్చు. కుక్కర్ మూత తీయకుండా ఓ అరగంట వదిలేసి, ఆపైన తీసి, కాస్త రోజ్ వాటర్ కలిపి, ఆపై ఫ్రిజ్‌లో వుంచాలి. బాగా చల్లగా తయారయ్యాక సర్వ్ చేయాలి.